گھر لوٹ کے جائیں گے تو پائیں گے اماں بھی
آنکھوں کی تھکن کرنے لگی راز عیاں بھی
یوں دل نہ بہاروں سے لگاؤ کہ سنا ہے
رستے میں محبت کے ہے اک عہدِ خزاں بھی
گر تجھ سے الجھتی ہیں نگاہیں تو برا کیا؟
اس دل میں تری چاہ کا رہتا ہے گماں بھی
بدلے ہوئے موسم کو کوئی جا کے بتائے
نظروں کے بدلنے سے بدلتا ہے سماں بھی
بارش میں نہ بہہ جائے مرا کچا گھروندا
بکھرا ہے جو اس بار یہ خوابوں کا نشاں بھی
اب کون وفاؤں کا طلبگار یہاں ہے
اس دل سے ندارد ہے جو احساسِ زیاں بھی
